AHMAD A’ZAM QISSALARI SARLAVHASINING BADIIY VAZIFASI

Mazkur maqolada Ahmad A’zam qissalari sarlavhasining badiiy vazifasi haqida atroflicha so‘z yuritilgan. Adib ijodida sarlavha oddiy nomlash vositasi emas, balki asar mazmunini ixchamlashtiruvchi, ramziy va falsafiy ma’nolarni o‘zida aks ettiruvchi estetik birlik sifatida keladi. “Quroq”, “Hali hayot bor…”, “Bu kunning davomi”, “Asqartog‘ tomonlarda” kabi qissalarning sarlavhasi qisqa va ixcham bo‘lishiga qaramay, yuzlab sahifalarga yoyilgan mazmunni umumlashtiradi, kitobxonni ichki mushohadaga undaydi. Tadqiqot davomida Ahmad A’zam sarlavhalarining ramziy ma’nolari, vaqt, umid, iztirob va ma’naviy yuksalish kabi g‘oyalarni mujassam etishdagi vazifasi yoritiladi. Natijada, adib qissalari sarlavhalari o‘zbek nasrida poetik yangilanish va badiiy tafakkurning o‘ziga xos ifodasi sifatida baholanadi.